ტურიზმი საქართველოში

Friday, January 25, 2013

კვლევა

ტურიზმის განვითარება საქართველოს ეკონომიკის ერთ-ერთი უპირველესი გაცხადებული პრიორიტეტია.
ივნისში ვიზიტორთა რაოდენობა 72 პროცენტით გაიზარდა
ივნისში საქართველოს 390 808 ვიზიტორი სტუმრობდა, რაც 2011 წლის იმავე პერიოდის მაჩვენებელზე 72 პროცენტით მეტია. ამ მონაცემებს შინაგან საქმეთა სამინისტრო აქვეყნებს.
2012 წლის ივნისში საქართველოს საზღვარზე გადაადგილებულ ვიზიტორთა შესახებ არსებული სტატისტიკურ მონაცემების თანახმად, აქტიურობენ ახლო და მეზობელი ქვეყნების მოქალაქეები - 145 პროცენტით გაიზარდა ვიზიტორების რაოდენობა თურქეთიდან, 56 პროცენტით - უკრაინიდან.
100 პროცენტით გაიზარდა ვიზიტორთა რაოდენობა რუსეთიდან, 35 პროცენტით - სომხეთიდან, 32 პროცენტით - აზერბაიჯანიდან, 68 პროცენტით - ირანიდან. ევროკავშირის ქვეყნებიდან ჩამომსვლელთა რაოდენობამ კი ივნისში უკრაინისა და ირანის მაჩვენებლებს გადააჭარბა.
შსს-ს ცნობით, ბოლო 4 თვის განმავლობაში, რუსეთის მოქალაქეებისთვის მიმოსვლის უვიზო რეჟიმის ცალმხრივად დაწესების შემდეგ, საქართველოში ამ ქვეყნიდან ვიზიტების როდენობამ საგრძნობლად იმატა, რაც 2012 წლის ივნისში, წინა წლის ანალოგიურ პერიოდთან შედარებით, 100-პროცენტიან ზრდაში გამოისახა.
რაც შეეხება 2012 წლის პირველ 6 თვეს, ქვეყანა სულ 1 690 493 ვიზიტორმა მოინახულა. ამასთან, იმავე 6-თვიან ინტერვალში ვიზიტების რაოდენობის ყოველთვიური 53-პროცენტიანი ზრდა ფიქსირდება.
საქართველოს ტურიზმის ეროვნული სააგენტოს შეფასებით, 2012 წელი ყველაზე დინამიკურია ქვეყნის ტურიზმის ინდუსტრიის განვითარებაში.

http://24saati.ge/index.php/category/business/2012-07-02/30237

Monday, December 24, 2012

რაჭა-ლეჩხუმის უნიკალური მემკვიდრეობა

მხარეში უამრავი საინტერესო, უნიკალური ისტორიულ - ეთნოგრაფიული, არქეოლოგიურ - არქიტექტურული ძეგლია. მათ შორის აღსანიშნავია ნიკორწმინდა, ბარაკონი, ხონჭიორი, მრავალძალი, პატარა ონი, ღები, კვირიკეწმინდა, ლაილაში, ჩაჟაშის კომპლექსი, მინდა - ციხე, კვარაციხე, ციხეთა კომპლექსი - “დახვდი”, “დაჰკარი” და “არ გაუშვა”, ონის საუკუნოვანი სინაგოგა, VII საუკუნის ცნობილი საეკლესიო მოღვაწის და თეოლოგის წმინდა მაქსიმე აღმსარებლის საფლავი და მონასტერი ცაგერის მუნიციპალიტეტში და ა. შ.

საქართველოს ისტორიული და კულტურული წარსული რომ ვაზთან, ვენახთანაა დაკავშირებული, მთელ მსოფლიოშია ცნობილი. ყოველივე ამას უმალ იგრძნობს ადამიანი, როდესაც თუნდაც ერთხელ ეწვევა საქართველოს ამ ლამაზ კუთხეებს და იქაურ ღვინოებს - “ხვანჭკარას”, “ალექსანდრეულს”, “ოჯალეშს” ან “თეთრას” დააგემოვნებს. საქართველოში გავრცელებული ვაზის 600 ჯიშთაგან, ამ მხარეში 300- მდე სახეობის ყურძენი მოჰყავთ. განსაკუთრებული პოპულარობით სარგებლობს ღვინო “ხვანჭკარა”, რომელსაც ადრე რაჭის ამავე სახელწოდების სოფელში, ალექსანდრეულისა და მუჯურეთულის ყურძნის ჯიშისაგან ამზადებდნენ.

ისტორიულ - ხუროთმოძღვრულ ძეგლთაგან განსაკუთრებულ ყურადღებს იმსახურებს XI საუკუნის ნიკორწმინდისა და XVIII საუკუნის ბარაკონის ტაძრები.

http://car-rent.ge/ka/saqartvelos-shesaxeb/racha-lechkhumi-and-lower-svaneti-ambrolauri-oni-lentekhi.html

რაჭა – ლეჩხუმი (ამბროლაური, ონი, ლენტეხი)

საქართველოს სამი ულამაზესი კუთხე – რაჭა, ლეჩხუმი და ქვემო სვანეთი ჩვენი ქვეყნის უკიდურეს ჩრდილო-დასავლეთ კიდეზე მდებარეობს. რაჭა-ლეჩხუმ-ქვემო სვანეთის მხარეში შედის ამბროლაურის, ონის, ცაგერის და ლენტეხის მუნიციპალიტეტები.

თვითმხილველთა უზომო აღტაცებას იწვევს მხარის მთიანეთი, კავკასიონის ჭაღარა მწვერვალები და მთაგრეხილები

მდინარეები და ჩანჩქერები, მრავალრიცხოვანი ტყის მასივები და მათში გავრცელებული ცხოველ - ფრინველები, ბუნებრივი გამოქვაბულები და მღვიმეები, უღელტეხილები, ალპური სათიბ - საძოვრები, ულამაზესი გზა - ბილიკები, შაორისა და ლაჯანის წყალსაცავები, სვანური მურყვამები (კოშკები) და სხვა სანახაობანი. განუმეორებელ ეფექტს ახდენს ეთნიკურად ადგილობრივი წარმოშობის მოსახლეთა გაცნობა და მათთან ურთიერთობა. უმდიდრესია მათი ისტორიული წარსული, ყოფა, კულტურა, ფოლკლორი.

საქვეყნოდაა განთქმული აქაური სამკურნალო მინერალური წყლები და კურორტები – შოვი, უწერა, ლაშიჭალა, ქვეშვაკე, მუაში, სორტუანი, ბუგეული, ხიდიკარი, სადაც მათივე სახელობის 25-ზე მეტი სამკურნალო - მინერალური და გოგირდოვანი წყალი მოიპოვება.
განსაკუთრებული ლანდშაფტით გამოირჩევა საკურორტო ადგილები – ხიდიკარი, წესიგორა, ურავი, ბარი, სხეფური, ქვედის ტბა და სხვა.